પાતકી – એક ગુનો, એક કબૂલાત… અને એથી પણ વધુ ગૂંચવાયેલું રહસ્ય

ગૌરવ પાસવાલા, હિતેન તેજવાની, શ્રદ્ધા ડાંગર અને સૂચિતા ત્રિવેદી જેવા મજબૂત કલાકારો સાથે,
અભિનવ દેશમુખ દ્રારા નિર્દેશિત અને દિવ્યેશ દોશી, આલાપ કીકાની, નૃપલ પટેલ, રાજૂ રાયસિંઘાની અને આનંદ ખામર દ્વારા નિર્મિત ‘પાતકી’ એક એવો ગુજરાતી સિનેમેટિક પ્રયોગ છે, જે પરંપરાગત ફોર્મ્યુલાથી બહાર આવીને દર્શકને વિચારતા કરી દે છે.

કથાનાં કેન્દ્રમાં છે – માનવ મહેતા(ગૌરવ પાસવાલા) અને નિત્યા મહેતા(શ્રદ્ધા ડાંગર) , એક પતિ-પત્નીનું દાંપત્ય જીવન. માનવને કામ માટે સતત ટ્રાવેલ કરતા રહેવું પડતું હોય છે. જ્યારે નિત્યા ઘરમાં એકલી. પાડોશમાં રહેતી હેમલતા દવે – જે આવજાવ કરતાં કરતાં પોતાની હાજરી સતત નોંધાવતી રહે છે – નિત્યાને થોડો કંટાળો આપે છે.

એકલતા દૂર કરવા માટે, માનવના કહેવાથી નિત્યા ક્લબ જોડાય છે અને અહિયાંથી એની જિંદગી એકદમ બદલાઈ જાય છે.

મોર્ડન લાઇફસ્ટાઇલ, હાઇ-સોસાયટી, નવા લોકો, નવી વિચારધારા – નિત્યા હવે પહેલા જેવી નથી રહેતી.
સંબંધો એવા એક તબક્કે પહોંચી જાય છે, જ્યાં શબ્દોમાં સમજાવવું મુશ્કેલ બની જાય.

અચાનક વળાંક… અને મોટો આઘાત

એક બિઝનેસ ટૂર રદ થાય છે…માનવ અચાનક ઘરે આવી જાય છે…અને ઘરે જોઈ લે છે એક બીજો માણસ, જે પોતાનું નામ પણ માનવ મહેતા જ જણાવે છે!

આઘાત! શંકા! ગુસ્સો!

માનવ ખુલાસો માંગે છે. પણ નિત્યા… કોઈ ગ્લાનિ વગર, કોઈ પસ્તાવા વગર, આ આખી પરિસ્થિતિ માટે માનવને જ જવાબદાર ઠેરવે છે.

“ભૂતકાળ વીતી ગયો છે… હવે બદલી શકાય તેમ નથી. દોષારોપણમાં સમય બગાડવા કરતાં, આજે જે છે એને સ્વીકારીને આગળ વધીએ.”

આ શબ્દો માનવ માટે અસહ્ય બની જાય છે.

ઝઘડો થાય છે…ગુસ્સો કાબૂ બહાર જાય છે…અને એક ક્ષણમાં – નિત્યાનું મૃત્યુ. આવેશમાં માનવથી નિત્યા ની હત્યા થઇ જાય છે.

અહિયાંથી ગૂંથાય છે રહસ્ય

માનવ પોતે જ પોલીસ પાસે જઈને ગુનો કબૂલ કરે છે. ઇન્સ્પેક્ટર અર્જૂન (હિતેન તેજવાની) સામે આખી ઘટના વિગતે વર્ણવે છે –ક્યારે, કયાં, કેવી રીતે હત્યા કરી…લાશ ક્યાં મૂકી… બધું જ!

પણ તપાસ પછી એક ચોંકાવનારો ખુલાસો થાય છે.

ઘરમાંથી માત્ર નિત્યાની લાશ મળે છે. પણ માનવે જે કહ્યું હતું તે મુજબ કોઈ પુરાવાઓ મળતા નથી. .

ઉપલબ્ધ પુરાવા માત્ર એક જ વાત કહે છે – નિત્યાનું મૃત્યુ આકસ્મિક છે.

માનવે હત્યા કબૂલ કરી હોવા છતાં, ઇન્સ્પેક્ટર અર્જૂન એને સમજાવે છે કે “તમે પત્નીના અચાનક મૃત્યુથી માનસિક આઘાતમાં છો. આ હત્યા નથી… આ અકસ્માત છે.” આ વાત માનવને અંદરથી ખાઈ જાય છે.

પ્રશ્નો… પ્રશ્નો… અને પ્રશ્નો

જો મેં હત્યા કરી છે, તો મારા કહ્યા મુજબના પુરાવા ક્યાં ગયા?

લાશ અને હત્યા સાથે જોડાયેલી વસ્તુઓ કોણે, ક્યારે અને શા માટે હટાવી?

હેમલતા બહેન, રિક્ષા ચાલક અને સોસાયટીનો સિક્યોરિટી ગાર્ડ – એમની જુબાની કેટલી વિશ્વસનીય?

આ આખી મિસ્ટ્રીમાં હેમલતા બહેનની ભૂમિકા કેટલી મહત્વની છે?

અને સૌથી મોટો પ્રશ્ન – ઇન્સ્પેક્ટર ગયા પછી માનવ અને હેમલતા બહેન વચ્ચે એવી શું વાત થઈ કે માનવ સંપૂર્ણ રીતે હતપ્રભ થઈ જાય છે?

એક પછી એક પરતો ખુલતી જાય છે… છતાં રહસ્ય વધુ ને વધુ ગૂંચવાતું જાય છે.

ફિલ્મ તરીકે ‘પાતકી’ કેમ અલગ પડે છે?

મિસ્ટ્રી અને સસ્પેન્સના ચાહકો માટે ‘પાતકી’ એક વિઝ્યુઅલ ટ્રીટ છે.

હા, પ્રથમ અર્ધની ધીમી ગતિ થોડું ધીરજ માંગે છે, પણ ઇન્ટરવલ પછી ફિલ્મ જરૂરી ઝડપ પકડી લે છે અને અંત સુધી બાંધી રાખે છે.

✔️ સિનેમેટોગ્રાફી આંખોને ગમે એવી
✔️ સંગીત વિષય પ્રમાણે ક્યુરિયોસિટી જગાવે છે
✔️ ધારદાર સંવાદો ફિલ્મને વધુ તાકાત આપે છે
✔️ નિર્દેશન થ્રિલર શૈલીમાં નવો ચીલો ચાતરે છે.

કથાવસ્તુ ભાવનાત્મક મુદ્દાઓને સ્પર્શે છે. અને દર્શકના અનુમાનને વારંવાર પડકારે છે.

અંતમાં…

‘પાતકી’ પરંપરાગત ગુજરાતી ફિલ્મોથી અલગ અભિગમ ધરાવતી, નવતર અને સાહસી મિસ્ટ્રી થ્રિલર છે.